ඩස්ටරේ කොහොමද අතනට ගියේ?

ඉබ්බලගේ combined maths සර්ගේ නම ටාර්සන්.ඉබ්බලට උගන්නපු පළවෙනි අවුරුද්දෙ හැමදාම සර් ඇන්දෙ ක්‍රීම් පාට කලිසමක්.දෙවෙනි අවුරුද්දෙම ඇන්දෙ කොළ පාට කලිසමක්.කොල්ලන්ට හරි ප්‍රශ්නෙ.ඇයි හත්වලාමෙ පලවෙනි අවුරුද්දෙ ඇඳපු ක්‍රීම් පාට කලිසම එක්ක මාරු කර කරවත් අඳින්න තිබ්බනෙ.සර් කවදාවත් සපත්තු පොලිෂ් කළේවත් ලේස් ගැටගැහුවෙවත් නෑ.කොණ්ඩෙත් කවදාවත් තෙල් ගෑවෙවත් පීරුවෙවත් නෑ.කැපුවෙත් මාස 6කට ඉතර සැරයක්.ඒ සර්ගේ හැටි.සර් මාර pure maths මීටරේ.සර්ගේ බොරු වංචා නෑ.එක පැත්තක් එහෙම වුනාට ඉබ්බා නම් හිතන්නේ සර් හොඳ මනුස්සයෙක් කියලයි.හැබැයි කේන්ති යන වෙලාවට සර්ට ඉහ වහා කේන්ති ගියා.පාළනයකින් තොරව.මේක දිගටම වෙලා සර්ට පසු කාළීනව බොහෝම බරපතල ප්‍රතිවිපාක වල මුහුණ දෙන්න සිද්ද වුනා 😦 .කරුමෙ තමා ඉතිං.සර්ට හඩ්ඩා(හඩ්සන්) කියලත් කාර්ඩ් එකක් තිබ්බා.තව වයිල්ඩ් බෝයි කියලත් කිවුවා.

කොහොම කොහොම හරි දවසක් ඉන්ටර්වල් එකට පස්සේ ඩබල් පීරියඩ්ස් තිබ්බෙ සර්ට.සර් ආවා.තාම පන්තිය කලබලයි.ඉන්ටර්වල් ඉවරවුන ගමන්නෙ.සර් ආයුබෝවන් කියලා කට්ටියට වාඩි වෙන්න කිවුවා.දැං සර් පාඩමට අදාල නෝට්ස් වගයක් බෝඩ් එකේ ලියනවා.පොඩි තැනක් වැරදුනා.සර් ඩස්ටරේ බැළුවා මේසෙ උඩ තියනවද කියලා. ඩස්ටරේ නෑ.ඉන්ටර්වල් එකට කළිං පීරියඩ් එකේ බෝඩ් එකේ චෝක් කෑල්ලකින් ඇඳලා ඒක ඩස්ටරෙං මකලා සීනි කූරා කොල්ලන්ට පටාර් ගාලා ගහ ගහ හිටියේ.හිටපු ගමං හයියෙන් කැරකෙන ඉස්සරහා ෆෑන් එකට ඩස්ටරේ දැම්මාම ඒක තට්ටට අහුවෙලා රැන්ඩම් ගිහිං එකෙක්ට වදිනවා.ඩස්ටරේ හොඳට හුණු ගාලනේ තියෙන්නෙ.වැදුනම හරියට අර ටී වී එකේ දිවියලෝකේ පෙන්නනකොට දුං අතරිං දෙයියෝ පෙන්නනවා වගේ තමා ඩස්ටරේ වැදිච්ච එකාව පේන්නෙ.හුණු විමානයයි 😛 .

සර්: කෝ මේසෙ උඩ තියෙන්න ඕනෙ ඩස්ටරේ?

කට්ටිය සද්දයක් නෑ.

සර්: මං අහන්නෙ කෝ ඩස්ටරේ? හොයනවලා ඩස්ටරේ.

සර්ට දැං ටිකක් ඉතර මළ පැනලා. දැං හැමෝම ඩස්ටරේ හොයනවා.ටික වෙලාවකිං පිටි පස්සෙ පේළියට කළිං පේළියේ ඩෙස්ක් එකක් අස්සෙ තිබිලා ඩස්ටරේ හම්බුනා.හම්බුන යාළුවා සර් මේ තියෙන්නෙ කියලා ගෙනත් දුන්නා.

සර්: ඩස්ටරේ කොහොමද එතනට ගියේ?

කවුරුත් සද්දයක් නෑ.සර් දැං බලං ඉද්දි යකා වේගෙන එන්නෙ.

සර්: හොඳයි දැං එකෙක්වත් කියන්නෙ නෑනෙ ඩස්ටරේ කොහොමද එතනට ගියේ කියලා,ඔක්කොමල්ල ගුටිකන්න ලෑස්ති වෙනවලා.

සර් ඉස්සරහා කොනේම ප්‍රජා ගාවටයයි.

සර්: නැගිටිනවා.

ප්‍රජා බයෙන් නැගිටියි.

සර්: තමුසෙ දන්නවද මේක (අතේ තියන ඩස්ටරේ පෙන්වයි) කොහොමද අතනට ගියේ කියලා?

ප්‍රජා නොදන්නා වග පෙන්වීමට හිස දෙපසට වනයි.

ටෝර්…

සර්: තමුසේ?

කන්දෙ චෑං නැගිටියි.නොදන්නා වග අඟවයි.ටෝර්…

සර්: තමුසේ? ලලා නැගිටියි. ටෝර්…

දැං සර් මැද ඉස්සරහා පේළියටත් ඇවිත්.එදිරියා කෑවා.ජින්නා නැගිට්ටා කන්න ලෑස්ති වෙලා.හරියට රඤ්ඤා වැලක් පුපුරනවා වගේ.කොල්ලො පේළියට නැගිටිනවා.සර් අත පුරෝලා කම්මුලට දෙනවා.මැද දෙවෙනි පේළියේ මැද පුටුවේ ඉන්නෙ ඉබ්බා.එහා පැත්තේ හොර අලියා.මෙහා පැත්තේ වූෂු මැස්සා.ඉබ්බගේ පපුව ඩිග් ඩිග් ගානවා.ඇඩ්‍රිනලිනුත් හෝ ගාලා වැඩ.

මේ වෙලාවෙ තමා පිටිපස්සෙම පේළියේ හිටපු මාල්ට හරි ඇලට්ට හරි හැරියට හරි(තුං දෙනාගෙං හරියටම කවුද කියලා ඉබ්බට දැං මතක නෑ) ගණදෙවි නුවණ පහළ වුනේ. යාළුවා නැගිට්ටා(අපි ඇලට් කියමුකෝ)

ඇලට්: සර් ඉන්ටර්වල් එකට එළියට ගිය තව කට්ටියක් තාම ආවෙ නෑ.සමහර විට ඒගොල්ලෝ දන්නවා ඇති

සර්: (සර්ට දැං ටිකක් හති වගේම කේන්ති අඩු වෙලා අනුකම්පාත් හිතිලයි හිටියේ.ඒ සර්ගේ හැටි.සෝඩා බෝතලේ වගේ තමා ඉතිං 🙂 ) ආ ඒ කතාවත් ඇත්ත තමා. අපි ටිකක් ඉඳලා බලමු.

සර් එහෙම කියනවාත් එක්කම සීනි කූරයි තව දෙන්නෙක් ඉතරයි දොර ඇරගෙන පන්තියට ආවා.

සර්: ආ… මේගොල්ලොද එන්න හිටියේ? කියමින් සීනි කූර දිහා බැලුවා.

සර් දන්නවා සීනි කූරා දඟලනවා කියලා.ඒ වගේම සීනි කූරා මීටරේ කියලත් දන්නවා.එහෙම කියපු ගමං සීනි කූරා සර් දිහායි කට්ටියගේ මූණු දිහායි බැළුවා.කොල්ලංගේ මූණු කොටු වෙලා, චොර වෙලා තියනවා දැක්කම සීනි කූරට තේරුණා මොකක් හරි හුටපටයක් කියලා.

සර්: තමුසෙ දන්නවද මේ ඩස්ටරේ කොහොමද අතනට ගියේ කියලා. සර් අතින් ඩස්ටරේ තිබුණ පිටුපස පේළිය පෙන්වයි.

සීනි කූරා: ආ… මේකනේ සර් වුනේ.ඉන්ටර්වල් එකට කලිං මං බෝර්ඩ් එක මක මක හිටියා.ඉන්නකොට ඉන්ටර්වල් බෙල් එක ගැහුවා.එතකොට අතන බත් එකක් දිග ඇරියා(ඩස්ටරේ තිබුන තැන අතින් පෙන්වයි).මම ටක් ගාලා එතනට ගියා බත් එක කන්න.ඩස්ටරේ මගේ අතේනෙ තිබ්බෙ.ඒකත් අරං යන්න ඇති.මතකනං නෑ සර්.( 😛 )

සර්: බලනවකො මේ මනුස්සයගේ වැඩෙං අහිංසකයෝ ටිකක් ගුටිකෑවා.හ්ම්…යනවා යනවා.ගිහිං වාඩි වෙනවා.

සීනි කූරාගේ ස්ථානෝචිත ප්‍රඥාව බිඳින්න ලොජික් එකක් ඔච්චර ගණං දන්න සර්ටත් හිතා ගන්න බැරි වුනා.එතකොට තමා ගුටිකන්න හිටපු කට්ටියට හුස්ම වැටෙන්න පටංගත්තේ 😀 .

කූරගේ මොළේ තමා මොළේ!

ක් ට
Advertisements

හොත්තිරිපඤ්ඤං…

ඉබ්බා ගිය කෙමිස්ට්‍රි පංතිය තිබ්බේ ඉරිදා උදේ නුගේගොඩ ලයිසියම් එකේ. පන්තියට ගිහිං ඉබ්බයි හොර අලියයි පයිංම ඇවිදගෙන සුපර් මාර්කට් හන්දියට එනවා බස් එකේ නගින්න.හොර අලියට බෝ ගහ ගාවිං 176 ගන්නත් ඉබ්බටත් එතනිංම 163 ගන්නත් පුළුවං වුනාට දෙන්නම අවට සිරි නරඹමින් හෝල්ට් 2ක් ඉතර ඇවිදගෙන එන්න තමා කැමති 🙂 .අතරමගදි රොටරිය පහු වෙනවා.නුගේගොඩ කාෂ්ඨකේ මල් වැස්සක් වහිනවා වගේ පන්ති යන බාලිකාවියෝ ගැන විස්තර විචාර පවත්වමින් ඇවිදං එන එක තමා සිද්ධ වුනේ 😛 .

ඔන්න දවසක් දෙන්නම එනකොට රොටරියේ පන්තියක් ඇරලා.සූ ගාලා කට්ටිය.උස අය, මිටි අය, කෙට්ටු අය, මහත අය, සුදු අය, කළු අය, සුදුත් නැති කළුත් නැති අය(හරියට ඉබ්බ වගේ), දිගට ඇඳපු අය, කොටට ඇඳපු අය මේ ඕනෑම වර්ගයක අය හෝ ගාලා වක්කඩ කැඩුවාම වතුර එනවා වගේ එනවා.ඉබ්බත් දැං හමුදාව ජනාධිපති උත්තමාචාර පවත්වනවා වගේ මූණ දකුණට හරෝගෙන ඉස්සරහට යනවා. එක පාරට ඉබ්බගේ එහා පැත්තෙං දඩබඩාං ගෑවා. ඉබ්බ ඉස්සරහා බැළුවා.ඔක්කොම තනි අළු පාටයි.නහයත් නිකං රළු පෘෂ්ඨෙක ගෑවුනාද මන්දායි ඉබ්බට හිතුනා.හත්වලාමයි! ඉබ්බා ලයිට් කණුවක් බදාගන්න ඔන්න මෙන්න.ඉබ්බ මුකුත් නොවෙච්ච ගානට හිමීං අඩියක් පස්සට ඇවිත් බැලුවා මොකද්ද සද්දෙ කියලා.මෙන්න බොලේ හොර අලියා අර ෆොටෝකොපි කියලා පාර අයිනෙ තිබුණ බෝඩ් එකක් දණි පනි ගාල කෙළිං කරනවා.ඒ මදිවට එතන පොඩි බස් හෝල්ට් එකකුත් තියනවා.මිනිස්සු බලනවා මුං දෙන්නට මහදවාලෙ මේ මොකෝ වෙලා තියෙන්නෙ කියලා.එකෙක් ලයිට් කණුවක් බදාගෙන, අනිකා යස අගේට පාර අයිනේ තිබුණ බෝර්ඩ් එකකට පයිං ගහලා.ක්ෂණයෙන් ඌර්ධවපාතනය වෙච්ච ඉබ්බයි හොර අලියයි නැවත ඝන තත්වයට පත් වුනේ ගෙවල් බලා යන බස් 2ක් ඇතුලේ.

සිද්ධාර්ථ කුමාරයා ඉපදුණ තැන අශෝක අධිරාජ්‍යයා අශෝක ස්ථම්භෙ පිහිටෙවුවා වගේ ඉබ්බයි හොර අලියයි චාටර් වෙච්ච තැන ලංකා විදුලිබල මණ්ඩලේ හිටෝපු ලයිට් කණුව තාමත් තියනවා. 🙂 හිහ්.ඉබ්බ නුගේගොඩ ගියාම තාමත් ඒකට ආචාර කරලයි එන්නෙ. එහෙමත් අමතක කරන්න පුළුවනෑ 😛 .