ඛන්නා සහ ගෝනි බිල්ලා

ඉබ්බට මතක ඉස්කෝලෙ කතා දැං සියට 99ක් ඉතරම ඉවරයි වගේ. තව ඔය එහෙ මෙහෙ මග ඇරුනු කීපයක් ඇති.ඒවත් මතක් වෙන විදියට ලියන්නංකො. මේ මාතෘකාවනං කතා දෙකකටයි අයිති.

ඉබ්බලගේ පන්තියට අල්ලපු පන්තිය බයෝ පන්තියක්.ඒකෙ හිටපු හොඳ මැන්ටලයක් තමා ඛන්නා. මැත්ස් පන්ති වගේ නෙමේ බයෝ පන්ති.හොඳට අතු ගාලා, ගුරු මේසෙටත් රෙද්දක් එහෙම දාලා, මල් වාස් එකකුත් තියලයි තියෙන්නෙ 🙂 .ඛන්නගෙ වැඩේ මුළු සෙක්ෂන් එකේම තියන කොසු උදේ පාන්දරම එකතු කරලා උංගෙ පන්තියේ තියන ස්ටෝර් රූම් එකට දානවා.කට්ටිය යනවා ඉතිං කොසු ඉල්ලන්න.ඛන්නා ඉන්නවා අර කහපාට රබර් ග්ලවු එකක් එක අතක දාගෙන.කොසු ඉල්ලන්න යන යන එවුං හූ තියාගෙන දුවගෙන එනවා.බලනකොට ඛන්නා කොල්ලංගේ වටිනාම වස්තුව අල්ලලා කරකවලා කඩාගන්න හදනවලු 😛 .ඉදිරි පරම්පරාව ගැන ආදරයක් ඇති කට්ටිය ඒ පැත්ත පළාතෙවත් යන එක අතැරියා.මේ සීන් එක නිසා තමා ව* කන්නා, ඛන්නා වුනේ 😛 .අනික නම ප්‍රසිද්ධියේ කියන්න අමාරුනේ.කොල්ලො බයෝ පන්තිය පැත්තෙ නොයන නිසා පස්සෙ පස්සෙ ඛන්නා ග්ලවු එක දාපු අත පිටිපස්සට කරලා හංගගෙන කොරිඩෝර් එක පැත්තෙත් සැරිසරන්න ගත්තා.ඉබ්බත් පරපුර බේරගත්තෙ බොහොම අමාරුවෙං.

ඉස්සර ඉබ්බලගේ ඉස්සරහා පේළියයි දෙවෙනි පේළියයි ඉතරයි පේළි මාරු වෙන්නෙ.අනික් එවුං ඉන්න තැන් වලම ඉන්නවා.මාරු වෙන්නෙ ඉබ්බයි හොර අලියයි වූෂු මැස්සයි හිටපු පේළියයි, විජේයි එදිරියයි ජින්නයි හිටපු පේළියයි.එදිරියා ඉස්සරහා පේළියේ ඉන්නකොට ජින්නා ලොකු පොත් බෑග් එකක පොත් අස් කරලා එදිරියට පේන්නෙ නැති වෙන්න ඔළුවට දානවා. පන්තියේ හැම තැනම ඉන්න කට්ටිය දූවලා ඇවිල්ලා එදිරියට නෙලනවා. ඇයි ඌට පේන්නෙ නෑනෙ කවුද නෙලන්නෙ කියලා.එදිරියා දඟලනවා ඔළුවට දාපු බෑග් එක ගලව ගන්න. ගැලවෙන්න ඔන්න මෙන්න තියෙද්දි කවුරු හරි එකෙක් ආයිත් ඒක ඔළුවට දාලා අල්ලනවා.එදිරියා කොහොමහරි ඩම් දාලා බෑග් එක ගලෝගන්නවා.ඒ වෙනකොට එදිරියට නෙලපු ගොඩ දෙනෙක් එහෙම එකක් වුනේ වත් නැති විදියට තම තමංගේ පාඩුවේ වැඩ.

එදිරියගෙ පළමු සැකකරු එහා පැත්තෙ ඉන්න ජින්නා.එදිරියා ජින්නගෙ බෙල්ලෙං අල්ලලා හොලෝනවා තෝ තමා කියලා.ජින්න කෑ ගහනවා නෑ යකෝ…මම මේ වැඩ…උඹට පේන්නෙ නැද්ද? (ජින්නා බාගෙට පෙරළපු පොතක් පෙන්නයි).

සමහරදාට එක පාරට එදිරියා ඔළුවෙං බෑග් එක ඉක්මනටම ගලෝ ගන්නවා.එදාට අත් උස්සගෙන ගහන්න ආපු එවුං එකෙක් දෙන්නෙක් එදිරියට අතටම අහුවෙනවා 🙂 . එදාට නං ඉතිං හරි තමා.එදිරියා උංව මුළු පන්තිය වටේම එළවලා අල්ලගෙන දෙනවා හොඳට.අඩුගානෙ සතියකට පාරක් වත් ඒ දවස් වල එදිරියව ගෝනි බිල්ලට අහු වෙනවා.ගෝනි බිල්ලට අහු වෙලා එදිරියා බලන්න ලස්සනයි.රතු වෙලා, කොණ්ඩෙ අවුල් වෙලා, අර කාර්ටුන් වල පූසට කරන්ට් වැදිලා වගේ ඉන්නවා 😛 .

ඉස්සර තව සෙල්ලමක් තිබ්බා එහා පැත්තෙ ඉන්න එකාගෙ පෑනක් හිමීට අත වද්දලා බිමට දානවා.පෑන ගන්න බිමට නැමුනම ඌව බිමට තියලා අල්ලගෙන ඉන්නවා නැගිටින්න බැරි වෙන්න. පන්තියෙ මෙහෙ හෝ ගාල උඩන්නනවා.විනාඩි පහකිං ඉතර අත අරිනවා.බිම හිටි එකා උඩ එනවා රතු වෙලා, දාඩිය දාලා.

ඒ කාලෙනං ඉතිං පිස්සු තමා හොඳම එකෙං 😀 .

<p style=”text-align: justify;”><span style=”font-size: medium; text-align: justify;”>

විජේ, ගහමුද බූරු අතක්?

ඉබ්බලගේ පන්තියේ හැමදාම අඩුම ගානෙ කාර්ඩ් පැක් 2ක් වත් තිබ්බා.එක කාර්ඩ් පැක් එකක් තිබ්බා ඒක අතටම දිය වෙලා.ඔක්කොම ප්‍රින්ට් මැකිලා.කොල ටික ඔක්කොම සුදු පාටයි.ලාවට වෝටර් මාර්ක් වගේ යාන්තං පේන ප්‍රින්ට් එකක කෑලි ටිකක් ඉතරයි කාර්ඩ් වල තියෙන්නෙ.ඒත් කට්ටිය දන්නවා කොලේ මොකක්ද කියලා.පැක් එක අතට ගත්තම කොල 52න් එකක් හරි අඩු නං කට්ටිය ටක් ගාලා කියනවා ඒයි…මේක කොල අඩුයි වගේනෙ බං කියලා. හාරත,කලාබර,රුයිත, ඉස්කෝප්ප,රෙපෝරු,කපෝති ඕවා තමා පන්තිය පිටිපස්සෙං ඇහෙන වචන.පන්තියේ පැක් 2ක් තිබුන දවසක පන්තියේ චන්ඩි සෙට් එක 100, 200 බෙට් දාලා බූරු ගහනවා.අනිත් ඔක්කොමලට එක පැක් එකයි තියෙන්නෙ.ඒක නිසා කට්ටිය අර ජූස් කියලා සෙල්ලමක් තියෙන්නෙ.ඒක ගහලා.සත පනහා, සත 25 තමා බෙට්.

ඊළඟට තිබ්බෙ විනය භාර සෝගාගෙ ෆිසික්ස් පීරියඩ් 2.කට්ටිය කාර්ඩ් ගගහා ඉන්නකොට සෝගා එකපාරම ආවා.චන්ඩි ටික 100, 200 බෙට් ටක් ගාලා සාක්කු වලට දාගෙන පැක් එකත් අතුරුදහං කරලා පොතුත් පෙරළගෙන.අහිංසකයෝ ටිකට සත පනහේ විසිපහේ ඒවා හංග ගන්නයි පැක් එක එකතු කරගන්නයි වෙලා ගියා.කෙළිංම කට්ටිය සෝගට මාට්ටු.

සෝගා: ආ… බූරු ගහනවා නේද? මෙහෙ එනවා මෙහෙ එනවා…කෝ ගන්නවා කාඩ් කුට්ටම.

සෝගා මාල්වයි, ගුජ්ජිකවයි, විජේවයි ඇදගෙන ආවා ඉස්සරහට.මේ ඔක්කොම තත්පර කීපයක් ඇතුලෙ තමා වුනේ.ජූස් ගහපු අනික් කට්ටියේ සීනි කූරා ඇතුලු කීප දෙනෙක්ට ඉන්න තැනට යාගන්නවත් වෙලාවක් ලැබුනෙ නෑ.සීනි කූරා එහෙම දැං බාගෙට ඩෙස්ක් එකකට හෙත්තු වෙලා  ඉස්සරහා වෙන්නෙ මොකක්ද කියලා බලං ඉන්නවා.ඉස්සරහ මුලින්ම ඉන්නේ ගුජ්ජික, ඊළඟට මාල්.ඊටත් පස්සෙ විජේ.පන්තියේ අනික් කට්ටිය මීයට පිම්බා වගේ. අදනං ඉතිං කෙළිංම ඇක්ෂන් මූවි තමා.

සෝගා: තුන් දෙනෙක්ට බූරු ගහන්න බෑනෙ.කෝ අනිත් එකා.

සර් දන්න දන්න ජූස් එකක් නෑනෙ.සර් හිතන විදියට දැං කට්ටිය බූරු තමා ගහලා තියෙන්නෙ.

සෝගා: කවුද අනික් එකා? සර් ගුජ්ජික දිහා බලයි.

ගුජ්ජික: දන්නෙ නෑ සර්.කලබලේට දැං මතක් වෙන්නෙ නෑ.

සෝගා: ආ…ඒකත් එහෙමද? එහෙනං කියන්නෑ නේද? ඉන්නවා වැඩක් කරන්න.

සෝගා වට පිට බලා පන්තිය පිටුපසට ගොස් කොස්ස ගෙන එයි.

සෝගා: කියපං කවුද අනික් එකා…සෝගා ගුජ්ජිකට කොස්සෙං ගහයි.ගුජ්ජික කොසු ප්‍රහාරය වළකන ගමං

කිව්වනෙ සර්…මතක නෑ කියලා(ගුජ්ජිකට මළත් පැනලා)

සෝගා විජේ දෙසට හැරෙයි. විජේ අහිංසකයා.

සෝගා: තමුසෙටත් මතක නැද්ද?

විජේ: මතක නෑ සර්…

සෝගා විජේට කොසු මිටි පහරක් දෙයි.විජේ උඩ පැන අතින් වළකයි.විජේගෙ මූණ චොර වෙලා.සෝගා තවත් පහරක් එල්ල කරන්නට කොස්ස ඔසවයි.

විජේ: ගහන්න එපා සර්… අරයත් ගැහුවා…අරයත් ගැහුවා…

හත්වලාමයි.සර් එකාවයි ඇහුවේ.මෙන්න යකෝ මූ දෙන්නෙක් පෙන්නපි 😀 .සර්ටත් වැඩේ මීටර් නෑ.සෝගට ජයග්‍රාහී හිනාවක් ගියා.

සෝගා: ආ…ඔය එන්නෙ…ඔය මතක් වුනේ.

සර් අලුත් සොයාගැනීම දෙස බලයි.

සෝගා: එනවලා, එනවලා ඉස්සරහට.

ඉබ්බට මතක විදියට ඇලටුයි, හැරියයි වෙන්න ඕනෙ දෙවනියට මාට්ටු වුනේ.හරියටම කවුද කියලා මතක නෑ.

සෝගා: කවුද බූරු කුට්ටම ගෙනාවෙ? ඒකත් මතක නැද්ද?

සෝගා මාල්ට කොසු මිට ඔසවයි.

මාල්: දන්නෙ නෑ සර්. පැක් එක තිබ්බා. අපි ගැහුවා.

සෝගා: ආ…ඒකත් එහෙමද?

සෝගා මාල්ට ගහන්න ඔන්න මෙන්න තියෙද්දි ගුජ්ජික කතා කළා.

ගුජ්ජික: සර්, අපි කට්ටිය සල්ලි දාලයි ගෙනාවෙ.

සෝගා: ආ… ඔය එන්නේ…

සර් හැමෝටම කොසු මිටෙං ආයිත් පාර පාර ගැහුවා.ඊට පස්සෙ කිවුවා ගිහිං ඉඳ ගන්න කියලා.පැක් එක රාජ සන්තක වුනා.තාම සීනි කූරා ඩෙස්ක් එකට බාගෙට හේත්තු වෙලා. සර් දැං සීනි කූරා දිහාවට ඇවිදං යනවා.පන්තියේ කට්ටිය බලං ඉන්නවා ඊගාවට මොකෝ වෙන්නෙ කියලා.සර් කූරගේ ඉස්සරහට ගියා.

සර්: ඇත්ත කියනවා…තමුසෙත් ගැහුවා නේද?

කූරා සිනහා මුසු මුහුණින්. නෑ සර්, මම ගැහුවේ නෑ. සෝගා සර් දන්නවා කූරත් මේ සෙට් එකේ ඉන්න ඕනෙ වග.

සෝගා: හොඳටම ෂුවර්ද?

සර් අත් දෙක අරගෙන සීනි කූරගෙ පපුවට තිබ්බා. නෝන්ඩි හිනාවක් දාලා කිවුවා තමුසෙත් ගහලා තියනවා ඕයි, හා…හා… ගිහිං වාඩි වෙනවා කියලා. කූරත් හිනා වෙවී ගිහිං වාඩි වුනා.

ඊට පස්සෙ කට්ටිය ඉඳලා හිටලා අහනවා විජේ, ගහමුද බූරු අතක් කියලා.

ජැකී චෑං බුදු අම්මෝ ගෑවලු…

ඉබ්බා එකතු වෙච්ච පොඩි පොඩි කතා ගොඩක් ලියන්නයි යන්නේ.

ජැකී චෑං බුදු අම්මෝ ගෑවලු

O/Lවලිං ඉබ්බලගේ ඉස්කෝලෙට ආපු හිත හොඳ කොල්ලෙක් තමා ප්‍රගති. ප්‍රගති හරියට දම්මි සුගත් කතාවෙ(ගොළු හදවත) සුගත් වගේ ඩයල් එකක්.ජෙනුයින් බුවා.දවසක් ෆ්‍රී පීරියඩ් එකක් වෙලාවෙ ප්‍රගති මිනිහා බලපු ෆිල්ම් එකක් ගැන රස කර කර කට්ටියට කියනවා.යාළුවෝ ටික වට වෙලා හුස්ම ගන්නෙත් නැතුව අහං ඉන්නවා.ඒ කාලෙ ඉතිං දැං වගේ හිතුනා, ඩවුන්ලෝඩ් කළා, බැළුවා සීන් නෑනෙ.කතා අහලත් කොච්චර සැනසුනාද?දැං ෆිල්ම් එකේ හොඳම සීන් එකක්.ප්‍රගති මවලා කියනවා.

ප්‍රගති: ජැකී චෑංගෙ ඔලුව ගහේ අත්තක හැප්පුණා.ජැකී චෑං බුදු අම්මෝ ගෑවා.

සීනි කූරත් කතාව අහගෙන හිටියා. ඉබ්බ හිටියේ ඉස්සරහා. ඒ වුනාට ඇන්ටනාව ඒ පැත්තෙ.

සීනි කූරා: නෑ…ජැකී චෑං බුදු අම්මෝ ගෑවෙ සිංහලෙංද?

තත්පරෙනුත් සීයෙං පංගුවයි ගියේ.කූරා නැගිට්ටා.පන්තිය දෙවනත් වෙන්න කෑ ගැහුවා.

සීනි කූරා: ඒයි…අඩෝ…මෙන්න අළුත් ෆිල්ම් එකක් ඇවිල්ලා…ජැකී චෑං සිංහලෙං බුදු අම්මෝ කියලා කෑ ගහන සීන් එකකුත් තියනවලු….ප්‍රගතියා බලලා…

ප්‍රගතියා ලැජ්ජාවෙං ඇඹරෙනවා.පන්තියේ කට්ටිය හිනා වෙනවා.ඊට පස්සෙ ප්‍රගති මොනා කිවුවත් ගොඩ දාන්න බැරි වුනා 🙂 .

හොරර් ෆිල්ම් එක

කාලයක් තිබ්බා කට්ටිය ගෙදරදි බලපු සිරා ෆිල්ම්(ඒ කාලෙ සිරා කියලා හිතං හිටපු) ඉස්කෝලෙ ඇවිත් අනික් සෙට් එකට ෆ්‍රී පීරියඩ් වලදි කියන. ඒ කාලෙ කරපු ඒ වගේ වැඩ මතක් වෙලා දැං නම් හිනාත් යනවා 😀 .දවසක් සීනි කූරා ෆිල්ම් එකක් කියන්න පටං ගත්තා.

සීනි කූරා: මේක මචං හැබැයි හොරර් ෆිල්ම් එකක්

ප්‍රගති: හොර ෆිල්ම් එකක් නැතුව හොඳ එකක් කියපංකෝ

කට්ටිය මොහොතකට නිෂ්ශබ්ධ වුනා.ප්‍රගතියා හොරර්(horror) කියලා වචනයක් ඒ දවස් වල දැනං ඉඳලා නෑ.ඒ නිෂ්ශබ්ධ වෙච්ච ක්ෂණයෙන් පස්සෙ ප්‍රගතියා කම්බස් වුනා.ඊට පස්සෙ කට්ටිය ප්‍රගතියගෙං ඉඳලා හිටලා අහනවා හොරර් ෆිල්ම් එකක් බලමුද කියලා 😛 .

කළුම කළු සුද්දා

හැරියාත් ඉබ්බලගේ පන්තියට ආවෙ O/L වලිං.හැරී ඉස්සර ගිහිං තියෙන්නෙ මීගමුවේ හරිස්චන්ද්‍රෙට.හරිස්චන්ද්‍ර තමා කෙටි වෙලා හැරී වුනේ.හැරියා ඉතිං මීගමුවෙනේ.දවසක් හැරියා සුද්දෙකුගේ කතාවක් කියනවා. රස කර කර.කට්ටිය කට ඇරගෙන කෙළ හලාගෙන අහං ඉන්නවා.

හැරී: සුද්දි මචං සුදුම සුදුයි.ඒකට සුද්දා කළුම කළුයි.

සීනි: කූරා ඈ යකෝ?කළුනං ඌ කොහොමද සුද්දෙක් වුනේ?

හැරියා ඇන ගත්තා 😛 .සීනි කූරා පන්තිය දෙවනත් වෙන්න කෑ ගහනවා.

ඒ…අඩෝ…මීගමුවේ සුද්දෝ කළුයිලු…හෙහ්…හෙහ්… 🙂

හැරියට විනාඩි කීපයක් යනකං කට අරින්නවත් බැරි වුනා.

සීනි කූරගේ ප්‍රියතම විෂය කෙමිස්ට්‍රි. කූරා කෙමිස්ට්‍රි බීලා හිටියේ.ඉබ්බලගෙ ඉස්කෝලෙට කෙමිස්ට්‍රි තරගෙකිං සමස්ත ලංකා පළවෙනි තැන දිනලා දීපු ටීම් එකේ සීනි කූරත් සාමාජිකයෙක්.කෙමිස්ට්‍රි ලැබ් එක තිබ්බෙ සෙක්ෂන් එකේ පහළ කොනේම.ප්‍රැක්ටිකල් වලට මුලිංම ලැබ් එකට දුවගෙන යන්නෙ සීනි කූරා. ලැබ් එක මැද හරියේ කට කැඩුනු ටැප් එකක් තිබ්බා. ඒක ඇරපු ගමං ගානට දොර ගාවට චූස් ගාලා වතුර පාරක් විදිනවා.කූරා මුලිංම ගිහින් එතන වාඩි වෙනවා. එකා එකා දොර ගාවිං එනකොට ටැප් එක ඇර ඇර වහනවා. ප්‍රැක්ටිකල් පටංගන්න කොට ඔක්කොමලා බාගෙට නාලා ඉන්නේ :D. ඊට පස්සෙ කූරා චූෂන බෝතලේට වතුර එකක් පුරෝගෙන හිමීං එක එකා ගාවට ඇවිත් කතාවක් දාගෙන ඉන්න ගමං චූෂන බෝතලේ අර දිග බටේ සාක්කුවට දාලා එක පාරම මිරිකනවා.කට්ටියගේ කකුල දිගේ වතුර පාර යනකොට තමා වැඩේ ක්ලික් වෙන්නෙ.එතකොට ඉතිං කූරව ඇල්ලිලි බොරු.ප්‍රැක්ටිකල් ඉවර වෙනකොට ලැබ් එකේ මී හරක් ලැගලා වගේ මඩ වෙලා.හැමදාම ඉබ්බලගෙ කෙමිස්ට්‍රි මැඩම් ලැබ් එක භාර සර්ගෙං බැණුං අහනවා ළමයි ටික කන්ට්‍රෝල් කරගන්න බෑ කියලා.

සීනි කූරා හැමදාම ලැබ් එකේ තියන මොනාහරි පොඩි රසායන ද්‍රව්‍ය ටිකක කොලේක ඔතාගෙන ගෙදර ගෙනියනවා ගෙදරත් ලැබ් එකක් දාන්න කියලා.කල් යනකොට කල් යනකොට ලැබ් එකේ බඩු මදිවෙනකොට සීනි කූරගේ ගෙදර ලැබ් එකෙනුත්  බඩු ගෙන්න ගන්න සිද්ධ වුනා.

කෙමිස්ට්‍රි ප්‍රැක්ටිකල් වෙලාවේ පරීක්ෂණ කීපයක් කළාම සීනි කූරා හැමදාම සාරාංශ පරීක්ෂණයක් කරනවා.ඒකෙදි කරන්නෙ දවසෙම හදපු ද්‍රාවන එක ටෙස්ට් ටියුබ් එකකට දානවා.සමහරදාට ටෙස්ට් ටියුබ් පුපුරනවා.සමහරදාට ගිනි ගන්නවා.සමහරදාට කළු වෙලා ගඳ ගහලා පළාතෙවත් ඉන්න බැරි වෙනවා.මේ වැඩේ නිසා නම් ටෙස්ට් ටියුබ් බර ගාණක් ආපහු පාවිච්චි කරන්න බැරි වෙලා ගියා 🙂 .

දවසක් කෙමිස්ට්‍රි මැඩම් පන්තියේ උගන්නන කොට සීනි කූරා පත කොළයක් තියාගෙන මොනවදෝ කරනවා.

මැඩම්: මොනාද කූරා ඔය කරන්නෙ? පාඩම අහගන්නෙත් නැතුව.

කූරා කොලේ ඔසවා පෙන්වමින් මේ උඩ තියෙන්නෙ මැඩම් ‘මේ’ කියපු වාර ගාණ, පහළ තියෙන්නෙ පීරියඩ් එකහමාරක් තුල ‘අනේ’  කියපු වාර ගාණ.කූරා පත කොලයක් පිරෙන්න පහේ ගොඩවල් කපලා.කූරගේ සංගණනය අනුව මැඩම් එකසිය ගාණට ‘මේ’, ‘අනේ’ කියලා. හිහ්…මැඩම් බණිනවා හෝ ගාලා.බනින අස්සෙ තියන ‘මේ’ , ‘අනේ’ඒවත් කූරා මාර්ක් කරනවා.හිහ්… 😛

ඩස්ටරේ කොහොමද අතනට ගියේ?

ඉබ්බලගේ combined maths සර්ගේ නම ටාර්සන්.ඉබ්බලට උගන්නපු පළවෙනි අවුරුද්දෙ හැමදාම සර් ඇන්දෙ ක්‍රීම් පාට කලිසමක්.දෙවෙනි අවුරුද්දෙම ඇන්දෙ කොළ පාට කලිසමක්.කොල්ලන්ට හරි ප්‍රශ්නෙ.ඇයි හත්වලාමෙ පලවෙනි අවුරුද්දෙ ඇඳපු ක්‍රීම් පාට කලිසම එක්ක මාරු කර කරවත් අඳින්න තිබ්බනෙ.සර් කවදාවත් සපත්තු පොලිෂ් කළේවත් ලේස් ගැටගැහුවෙවත් නෑ.කොණ්ඩෙත් කවදාවත් තෙල් ගෑවෙවත් පීරුවෙවත් නෑ.කැපුවෙත් මාස 6කට ඉතර සැරයක්.ඒ සර්ගේ හැටි.සර් මාර pure maths මීටරේ.සර්ගේ බොරු වංචා නෑ.එක පැත්තක් එහෙම වුනාට ඉබ්බා නම් හිතන්නේ සර් හොඳ මනුස්සයෙක් කියලයි.හැබැයි කේන්ති යන වෙලාවට සර්ට ඉහ වහා කේන්ති ගියා.පාළනයකින් තොරව.මේක දිගටම වෙලා සර්ට පසු කාළීනව බොහෝම බරපතල ප්‍රතිවිපාක වල මුහුණ දෙන්න සිද්ද වුනා 😦 .කරුමෙ තමා ඉතිං.සර්ට හඩ්ඩා(හඩ්සන්) කියලත් කාර්ඩ් එකක් තිබ්බා.තව වයිල්ඩ් බෝයි කියලත් කිවුවා.

කොහොම කොහොම හරි දවසක් ඉන්ටර්වල් එකට පස්සේ ඩබල් පීරියඩ්ස් තිබ්බෙ සර්ට.සර් ආවා.තාම පන්තිය කලබලයි.ඉන්ටර්වල් ඉවරවුන ගමන්නෙ.සර් ආයුබෝවන් කියලා කට්ටියට වාඩි වෙන්න කිවුවා.දැං සර් පාඩමට අදාල නෝට්ස් වගයක් බෝඩ් එකේ ලියනවා.පොඩි තැනක් වැරදුනා.සර් ඩස්ටරේ බැළුවා මේසෙ උඩ තියනවද කියලා. ඩස්ටරේ නෑ.ඉන්ටර්වල් එකට කළිං පීරියඩ් එකේ බෝඩ් එකේ චෝක් කෑල්ලකින් ඇඳලා ඒක ඩස්ටරෙං මකලා සීනි කූරා කොල්ලන්ට පටාර් ගාලා ගහ ගහ හිටියේ.හිටපු ගමං හයියෙන් කැරකෙන ඉස්සරහා ෆෑන් එකට ඩස්ටරේ දැම්මාම ඒක තට්ටට අහුවෙලා රැන්ඩම් ගිහිං එකෙක්ට වදිනවා.ඩස්ටරේ හොඳට හුණු ගාලනේ තියෙන්නෙ.වැදුනම හරියට අර ටී වී එකේ දිවියලෝකේ පෙන්නනකොට දුං අතරිං දෙයියෝ පෙන්නනවා වගේ තමා ඩස්ටරේ වැදිච්ච එකාව පේන්නෙ.හුණු විමානයයි 😛 .

සර්: කෝ මේසෙ උඩ තියෙන්න ඕනෙ ඩස්ටරේ?

කට්ටිය සද්දයක් නෑ.

සර්: මං අහන්නෙ කෝ ඩස්ටරේ? හොයනවලා ඩස්ටරේ.

සර්ට දැං ටිකක් ඉතර මළ පැනලා. දැං හැමෝම ඩස්ටරේ හොයනවා.ටික වෙලාවකිං පිටි පස්සෙ පේළියට කළිං පේළියේ ඩෙස්ක් එකක් අස්සෙ තිබිලා ඩස්ටරේ හම්බුනා.හම්බුන යාළුවා සර් මේ තියෙන්නෙ කියලා ගෙනත් දුන්නා.

සර්: ඩස්ටරේ කොහොමද එතනට ගියේ?

කවුරුත් සද්දයක් නෑ.සර් දැං බලං ඉද්දි යකා වේගෙන එන්නෙ.

සර්: හොඳයි දැං එකෙක්වත් කියන්නෙ නෑනෙ ඩස්ටරේ කොහොමද එතනට ගියේ කියලා,ඔක්කොමල්ල ගුටිකන්න ලෑස්ති වෙනවලා.

සර් ඉස්සරහා කොනේම ප්‍රජා ගාවටයයි.

සර්: නැගිටිනවා.

ප්‍රජා බයෙන් නැගිටියි.

සර්: තමුසෙ දන්නවද මේක (අතේ තියන ඩස්ටරේ පෙන්වයි) කොහොමද අතනට ගියේ කියලා?

ප්‍රජා නොදන්නා වග පෙන්වීමට හිස දෙපසට වනයි.

ටෝර්…

සර්: තමුසේ?

කන්දෙ චෑං නැගිටියි.නොදන්නා වග අඟවයි.ටෝර්…

සර්: තමුසේ? ලලා නැගිටියි. ටෝර්…

දැං සර් මැද ඉස්සරහා පේළියටත් ඇවිත්.එදිරියා කෑවා.ජින්නා නැගිට්ටා කන්න ලෑස්ති වෙලා.හරියට රඤ්ඤා වැලක් පුපුරනවා වගේ.කොල්ලො පේළියට නැගිටිනවා.සර් අත පුරෝලා කම්මුලට දෙනවා.මැද දෙවෙනි පේළියේ මැද පුටුවේ ඉන්නෙ ඉබ්බා.එහා පැත්තේ හොර අලියා.මෙහා පැත්තේ වූෂු මැස්සා.ඉබ්බගේ පපුව ඩිග් ඩිග් ගානවා.ඇඩ්‍රිනලිනුත් හෝ ගාලා වැඩ.

මේ වෙලාවෙ තමා පිටිපස්සෙම පේළියේ හිටපු මාල්ට හරි ඇලට්ට හරි හැරියට හරි(තුං දෙනාගෙං හරියටම කවුද කියලා ඉබ්බට දැං මතක නෑ) ගණදෙවි නුවණ පහළ වුනේ. යාළුවා නැගිට්ටා(අපි ඇලට් කියමුකෝ)

ඇලට්: සර් ඉන්ටර්වල් එකට එළියට ගිය තව කට්ටියක් තාම ආවෙ නෑ.සමහර විට ඒගොල්ලෝ දන්නවා ඇති

සර්: (සර්ට දැං ටිකක් හති වගේම කේන්ති අඩු වෙලා අනුකම්පාත් හිතිලයි හිටියේ.ඒ සර්ගේ හැටි.සෝඩා බෝතලේ වගේ තමා ඉතිං 🙂 ) ආ ඒ කතාවත් ඇත්ත තමා. අපි ටිකක් ඉඳලා බලමු.

සර් එහෙම කියනවාත් එක්කම සීනි කූරයි තව දෙන්නෙක් ඉතරයි දොර ඇරගෙන පන්තියට ආවා.

සර්: ආ… මේගොල්ලොද එන්න හිටියේ? කියමින් සීනි කූර දිහා බැලුවා.

සර් දන්නවා සීනි කූරා දඟලනවා කියලා.ඒ වගේම සීනි කූරා මීටරේ කියලත් දන්නවා.එහෙම කියපු ගමං සීනි කූරා සර් දිහායි කට්ටියගේ මූණු දිහායි බැළුවා.කොල්ලංගේ මූණු කොටු වෙලා, චොර වෙලා තියනවා දැක්කම සීනි කූරට තේරුණා මොකක් හරි හුටපටයක් කියලා.

සර්: තමුසෙ දන්නවද මේ ඩස්ටරේ කොහොමද අතනට ගියේ කියලා. සර් අතින් ඩස්ටරේ තිබුණ පිටුපස පේළිය පෙන්වයි.

සීනි කූරා: ආ… මේකනේ සර් වුනේ.ඉන්ටර්වල් එකට කලිං මං බෝර්ඩ් එක මක මක හිටියා.ඉන්නකොට ඉන්ටර්වල් බෙල් එක ගැහුවා.එතකොට අතන බත් එකක් දිග ඇරියා(ඩස්ටරේ තිබුන තැන අතින් පෙන්වයි).මම ටක් ගාලා එතනට ගියා බත් එක කන්න.ඩස්ටරේ මගේ අතේනෙ තිබ්බෙ.ඒකත් අරං යන්න ඇති.මතකනං නෑ සර්.( 😛 )

සර්: බලනවකො මේ මනුස්සයගේ වැඩෙං අහිංසකයෝ ටිකක් ගුටිකෑවා.හ්ම්…යනවා යනවා.ගිහිං වාඩි වෙනවා.

සීනි කූරාගේ ස්ථානෝචිත ප්‍රඥාව බිඳින්න ලොජික් එකක් ඔච්චර ගණං දන්න සර්ටත් හිතා ගන්න බැරි වුනා.එතකොට තමා ගුටිකන්න හිටපු කට්ටියට හුස්ම වැටෙන්න පටංගත්තේ 😀 .

කූරගේ මොළේ තමා මොළේ!

ක් ට

උරුසිමොටා

ඉබ්බා අද නං පොඩි කුණ්ඩලීන යෝග පාරක් දාලා ආපහු හය වසරට යන්නයි හදන්නෙ(මේ දවස් වල කිය කිය හිටියේ A/L කාලෙ කතානේ).

ඉබ්බගේ ලොකු අක්කගේ නම යකබණ්ඩා. පොඩිකාලෙ එයා යකා වගේ(තාමත් ටිකක් එහෙම තමා. දැං ඒ යහපත් වැඩ වඩා මොඩනයිස්ඩ් ආකරයකට යකබණ්ඩගේ පොඩි පුතා ඉදිරියට ගෙන යනවා 😛 ). පොඩි අක්කා පුහුලං බට්ටී. ඉබ්බගේ ලොකු අම්මාගේ පොඩිම පුතා උරුසිමොටා. උරුසිමොටා ඉබ්බට වඩා අවුරුදු 4ක් ඉතර බාලයි. උරුසිමොටා ඉබ්බට කියන්නේ තේ කොළ මුල්ල කියලයි. උරුසිමොටාලා ඉන්නේ කළුතර.ඉස්සර ඉස්කෝලෙ නිවාඩු දීපු ගමං උරුසිමොටා එදාම හවස එනවා ඉබ්බලගේ ගෙදර නවතින්න. මාසයක්ම ඉඳලා ඉස්කෝලෙ පටංගන්න කළිං දවසේ තමා උරුසිමොටා ගෙදර යන්නේ.ඒ කාලේ උරුසිමොටා දෙක වසරේ ඉතර ඇති. හවසට කට්ටියම සෙල්ලං කරළා යකබණ්ඩගෙයි පුහුලං බට්ටිගෙයි කාමරේට ඇවිත් ෆෑන් එක දාගෙන මහන්සි නිවාගන්නවා.කාමරේ තිබ්බා උස කන්නාඩියක්.උරුසිමොටා පුරුද්දක් හැටියට කන්නාඩිය ඉස්සරහට වෙලා එකේක විකාර කරනවා.ඉබ්බගෙ අම්මාට ඒ දවස් වල නිවියා ක්‍රීම් මේනියාවක් තිබ්බා.කෑමට පෙර සහ කෑමට පසු වශයෙනුත් අම්මා නිවියා ක්‍රීම් මූණ පුරා ගාගන්නවා 🙂 .අම්මගේ නිවියා මේනියාව දන්න රට ගිහිං එන නෑදෑයෝ පවා ඒ දවස් වල අනිවාර් යයෙන් තඩි නිවියා ක්‍රීම් එකක් ගෙනත් දෙනවාමයි.ඔන්න දවසක් දාඩිය පෙරාගෙන ආපු උරුසිමොටාට කන්නාඩි මේසෙ උඩ තිබිලා නිවියා එකක් අහු වුනා.දැං උරුසිමොටා නිවියා එක ඇරලා හොඳ තලියක් උලාගන්නයි කල්පනාව.මේ වෙලාවේ යකබණ්ඩට හොඳ නුවණක් පහළ වුනා.

යකබණඩා: හා…හා…වොෂ් එකක් දාලත් නෑ නේද?දුවල ගිහිං ඇඟ හෝදං එන්න. ඊට පස්සෙ ඕක දෙන්නං.

උරුසිමොටාත් ඉතිං පොඩියිනේ. ටක්ගාලා ගියා ඇඟහෝදගෙන එන්න.ගිය අතරෙදි යකබණඩා මරු වැඩක් කළා.යකබණ්ඩා ගත්තා අම්මගේ ඉවර වෙච්ච නිවියා ටින් එකක්. අරගෙන ඒකේ බාගයක් ඉතර පිරෙන්න දැම්මා වින්ටර්ජිනෝ.දෙකම ටිකක් එක පාටනේ.දාලා කන්නාඩි මේසෙ උඩිං තියලා හොඳ නිවියා එක හැංගුවා.විනාඩි 10කිං 15කිං ඉතර උරුසිමොටා එකේක විකාර කර කර එනවා නිවියා උලාගන්න.දැං නිවියා ටින් එක තියනවා කන්නාඩි මේසෙ උඩ.උරුසිමොටා ටින් එක ගත්තා.ඇරියා ටින් එක.අතට ගත්තා හෙන තලියක්(සුවඳ බලන්නවත් උරුසිමොටාට සිහියක් තිබ්බෙ නෑ.යකබණ්ඩයි,පුහුලං බට්ටියි, ඉබ්බයි හිනාව තද කරගෙන බලං ඉන්නවා).දෙඅත්ලේ හොඳට උලාගෙන මූණ පුරා ගාගෙන ගාගෙන ගියා.උරුසිමොටා තත්පර දෙක තුනක් කන්නාඩියෙන් බලං හිටියා.මූණ අත් දෙකෙං වහගත්තා.බුදු අම්මෝ! ගාගෙන කාමරේ පෙරලගෙන දිවුවා.යකබණ්ඩයි, පුහුලං බට්ටියි, ඉබ්බයි හොඳ හැටි හිනාවුනා.ඊට පස්සෙ නං උරුසිමොටා කන්නාඩිය පැත්ත පලාතටවත් ගියේ නෑ 😀 .

තව දවසක් ඉබ්බගේ තාත්තා කිවුවා උරුසිමොටාට පුතා, ගිහිං ෂැම්පූ බෝතලේ අරං එන්න කියලා.උරුසිමොටා කියලා ඉවරවෙන්නත් කලිං ගියා ගේන්න.ටික වෙලාවකිං උරුසිමොටා ෂැම්පු බෝතලේ ගෙනත් දුන්නලු.බෝතලේ ටිකක් ලොකු වැඩියි වගේලු.තාත්තා බැලුවලු මේ මොකෝ මේ කියලා.බැලින්නං කොල්ලා බාත්රූම් එක මදින හාර්පික් බෝතලේ ගෙනත් දීලාලු බාප්පගේ ඔළුවේ ගාන්න(ගෑවනං එහෙම ඉබ්බගේ තාත්තාගේ කොණ්ඩේ ගිහිං මෙලහට සෑහෙන කල් 😛 ).ඊට පස්සෙ උරුසිමොටාට හාර්පික් කියලත් කාර්ඩ් එකක් වැටුනා 🙂 .

උරුසිමොටාගෙ ඇඩ්වෙන්චර්ස් තව සෑහෙන්න තියනවා.දවසක් මොන්ටිසෝරි යන කාලෙ උරුසිමොටා උදේ ටූත් බ්‍රෂ් එකත් කටේ ගහගෙන උරුසිමොටාගෙ පොඩි අයියා, නුග නට් එක්ක කොට්ට පොර ගේම් එකක් ගියාලු.කොට්ට පොර ගේම් එක නැගලා ගිහිං නුග නට්ගේ දක්ෂ ප්‍රහාරයකින් උරුසිමොටා බිම ඇදවැටුනාලු.උරුසිමොටාගේ ටූත් බ්‍රෂ් එක හක්ක පළාගෙන කන ගාවට ගිහිං නැවතුනාලු.බ්‍රෂ් එක ගන්න නාගොඩ හොස්පිටල් එකේ දොස්තර මහත්තයා ඔපරේෂන් එකකුත් කළාලු.ඒකෙං පස්සෙ උරුසිමොටාට කාර්ඩ් එකක් වැටුනා බුරුසු කියලා 😛 .තාමත් නුග නට් උරුසිමොටාට කියන්නේ කෝ මේ බුරුසු කොළු කියලයි.

උරුසිමොටා ශිෂ්‍යත්තෙ පාස් වෙලා ලොකු නමට ගියේ. A/L කරනකංම උරුසිමොටා හිටියේ ඉබ්බලගේ ගෙදර.උරුසි මොටා අළුත් ඉස්කෝලෙට ගිය ගමං ඉබ්බා හවුසස් ගැන ඇහුවා.

ඉබ්බා: ඕගොල්ලංගේ ඉස්කෝලෙ හවුසස් කීයක් තියනවද?

උරුසිමොටා: හතරයි

ඉබ්බා: මොනාද ඒවෑ නං?

උරුසිමොටා: ජේම්ස්, අ…කේර්, ම්…හප්, ටුයි.

ඉබ්බා කල්පනා කළා යකෝ මුංගේ ඉස්කෝලෙ ජපානෙ හිරෝහිතෝ අධිරාජ්‍යයාවත් දාපු එකක්ද කියලා. ජේම්ස්, කේර්,හප්,ටුයි. තුම්මුල්ලේ ඉස්කෝලෙවත් නැතුව ඇති මෙහෙම අප්සට් හවුසස් 4ක් කියලා ඉබ්බට හිතුනා.කොහොම වුනත් උරුසිමොටා ඒ කාලේ ටොම් පච අත අරිනවා ගේමක් නැතුව.ටික වෙලාවකිං ඉබ්බට තේරුනා මේක මොටාගේ තවත් එක් බොරුවක් වග.ඒත් විනාඩි කීපෙකට හරි උරුසිමොටා ඉබ්බව ඇන්දුවා 🙂 .

ඉස්සර උරුසිමොටාගෙ පොඩි අයියා නුග නට්ගෙයි ලොකු අයියා මයිනාගෙයි ඔලුවේ කපුටෝ කොටලා වගේ කොණ්ඩේ තැනිං තැන නෑ.ඇයි කියලා ඇහුවාම උරුසිමොටා සෙල්ලං බඩු වල තිබිච්ච බැට්‍රි කෑලි ගලෝලා ප්‍රහාර එල්ල කරලා ඔළු පැලිච්ච මාර්ක් තමා ඒ.ලොකු අම්මාට ඉන්නේ කොල්ලොම තුන් දෙනෙක්.ගෙදර නිකං යකුන් නැටූ පිටිය වගේ 😛 .දවසක් හොඳ වැඩක් වෙලා තිබ්බා.උරුසිමොටාගේ ලොකු අයියා, මයිනා, මොකක්දෝ කරලා ඉබ්බගේ මහප්පාට මළ පැනලලු.මයිනට නෙළන්න මහප්පා එලෝගෙන ආවාලු.මයිනා මැදසාලේ මේසෙ වටේ දුවන නිසා අල්ලගන්නත් බෑලු.බැරිම තැන මහප්පා එළියට ගිහිං ගඩොල් බාගයක් අරං ආවාලු.

නැවතියං, ගහනවා කිවුවලු.

මූ නෙමේ නවතින්නේ.මහප්පා හොඳටම මළ පැනලා කෙලලා ඇරියලු.මයිනා ඔළුව පාත් කළාලු.

සලබලාං…

කැබිනට් එකේ වීදුරුව කුඩේ කුඩු වුනාලු.ඉන්න යක් පැටවු තුන්දෙනා මදිවට යක් තාත්තත් ගේමට බැහැලලු.ලොකු අම්මා බනිනවලු හෝ ගාලා අලි මදිවට හරක් කියලා 😀

« Older entries