මොකද මේ චර්ච් එකක් බෙල්ලෙ එල්ලගෙන?

ඉබ්බා ඉස්සර වැඩ කරපු ඔෆිස් එකේ යාළුවෙක් තමා මේවා කිවුවෙ.යාළුවට වැඩ බැරි වුනාට ගම ගාල්ලෙ.හිහ් හිහ්.යාළුවාට අපි කියමුකො සනා කියලා. සනාට වැඩත් පුලුවං.දැං බුවා එතන ලොක්කෙක්. කොහොමහරි… මේවා නිකං ජෙනරල් තියන කතා මම හිතන්නෙ.ඒවුනාට ඒවා සනායි සනාගෙ යාළුවොයි ඒගොල්ලො ගිය ඉස්කෝලෙ ප්‍රින්සිපල්ට සෙට් කරළා තමා තියෙන්නෙ.

සනා ගිහින් තියෙන්නෙ ගාල්ල මිහිඳු පාසලට. ඔන්න දවසක් ඉස්කෝලෙ නිවාඩු දවසක කොල්ලො සෙට් එකක් ඉස්කෝලෙ ඇවිත්ළු වැඩ වගේකට. දන්නෙ නැද්ද ඒ කාලෙ ඉතිං ඉස්කෝලෙ වැඩක් කිව්වම කසනවා වගෙනෙ.ගෙදර ඉන්නම බෑනෙ.එළියට බැහැපු ප්‍රින්සිපල් දැක්කළු මේ සෙට් එක.


churchප්‍රින්සිපල්: ආ.. පුතාලා මොකද මේ පැත්තෙ?

ළමයි: මේ පොඩි වැඩ වගේකට ආවා සර්

එතන හිටපු එක ශිෂ්‍යයෙක් කුරුස පෙන්ඩන්ට් එකක් සහිත මාලයක් පැළඳ සිටින බව ප්‍රින්සිපල් දකියි.

ප්‍රින්සිපල්: ආ… මොකද මේ චර්ච් එකක් බෙල්ලෙ එල්ලගෙන?

හහ්හා…. (චර්ච් එකක් බෙල්ලෙ එල්ල ගත්තා නම් කොල්ලා එතනම චර්ච් එකට යට වෙලා මැරෙනවා…😀 )

සනා තව කතාවක් කියනවා ප්‍රින්සිපල් ගැන.ඔන්න මිහිඳු පාසලේ ශිෂ්‍ය නායකයෝ එකතු වෙලා තර්ටි ෆස්ට් නයිට් පාර්ටි එකක් සංවිධානය කළාළු.දැං ප්‍රින්සිපල්ටත් ඉන්වයිට් කරන්න එපැයි. කට්ටිය ගියාළු දෙසැම්බර් මාසෙ මැද හරියෙ දවසක ප්‍රින්සිපල්ව හම්බු වෙන්න.

ප්‍රින්සිපල්: ආ… මොකද පුතාලා?

ශිෂ්‍යයෝ: සර් මේ තර්ටි ෆස්ට් නයිට් පාර්ටියට සර්ට ආරාධනා කරන්න ආවා. සර් එහෙනං එනවනෙ?

ප්‍රින්සිපල්: හා… බොහොම හොඳයි.මම අනිවාර්‍රයෙන් එනවා.

ශිෂ්‍යයෝ: එහෙනං අපි යන්නං සර්.

ප්‍රිෆෙක්ට්ස්ලා ටික ආපසු හැරී මද දුරක් යයි.

ප්‍රින්සිපල්: ස්… ස්…. පුතා… පුතා…

ශිෂ්‍යයෙක්: ඇයි සර්?

ප්‍රින්සිපල්: ඉතිං කිවුවෙ නෑනෙ කවද්ද දවස කියලා…

හහ්හා…. දීපංකෝ උත්තර….😀

ශ්‍රී වික්‍රම රාජසිංහ

ඔන්න ඉබ්බා සාමාන්‍ය පෙළ කරන කාලෙ.ඉබ්බගෙ ඒ දවස් වල හොඳම යාළුවෝ දෙන්න තමා නින්ජයි මුනියි. ඉබ්බලගේ ඉතිහාසය පීරියඩ් එක වෙලාව. ඉතිහාසය ඉගැන්නුවේ චාර්ලි සර්.සර්ට චාර්ලි කියලා දාලා තියෙන්නෙ ඉබ්බලගෙ ඉස්කෝලෙ කළිං හිටපු සහෝදරයෝ තමා. ඒ දවස් වල 10 වසරේ ඉතිහාසෙ පොත පටං ගන්නකොටම වගේ තියනවා චාර්ලිමේන් කියලා අධිරජ්‍යයෙක් ගැන. චාර්ලි සර් මේ අධිරජ්‍යයා ගැන කියන්න ගිහිං තමා කාර්ඩ් එක හදාගෙන තියෙන්නෙ. සර් 10 වසරෙ සෙක්ෂනල් හෙඩ්. ඒකත් මේ අධිරජ්‍යවාදී නමට හේතු වෙන්න ඇති.

ඔන්න සර් ප්‍රශ්නයක් ඇහුවා.

සර්: හොඳයි… කියන්න බලන්න අනුරාධපුර රාජධානිය ආක්‍රමණය කරපු දකුනු ඉන්දියානු රජෙක් ගේ නමක්… කෝ දන්න අය අත උස්සන්න.

(ඉබ්බට සර් අහපු ප්‍රශ්නෙ හරියටම මතක නෑ.ඒත් ඔය වගේ ප්‍රශ්නයක් තමා ඇහුවෙ.)

මෙන්න යකෝ කවදාවත් නැතුව මුනියත් අත උස්සගෙන ඉන්නවා…ඉබ්බට නම් ෂුඅර් මුනි මේකට උත්තරේ දන්නෙ නෑ කියලා. සර් පන්තිය පුරා බලයි. ළමයි භාගයක් පමණ අත උස්සාගෙන සිටිති.සර් බලලා බලලා පන්තියේ මැද හරියේ ඇස් රඳවයි.

rajasingheසර්: හා… කියන්න බලන්න ඔයා…

හත් වලාමයි… චාර්ලි ඍජුව අත ඔසවාගෙඅ සිටින මුනිව පෙන්වයි. මුනි කෙළින් නැගිට සිටියි.වීරයා සේ හඩ අවදි කර මහ හඩින්…

මුනි: ශ්‍රී වික්‍රම රාජසිංහ

(ඩෝං පටෝං චට පටාස් චුස් බුස් ඩිම්ම්ම්ම්….ඉබ්බටත් නින්ජටත් කට පියාගෙන බඩ පැළෙන්න හිනා…)

සර්: ආහ්… ශ්‍රී වික්‍රම රාජසිංහ? ඔයා නම් පොත බලලම නෑ…

මුනි ෂේප් එකේ වාඩි වෙයි (වෙලාවට සර් එදා හොඳ මූඩ් එකක හිටියෙ. නැත්තම් මුනිය ගුටිත් කනවා. මුනියගෙ නරක වෙලාව තමා.ඌ හිතලා නෑ සර් ඌවම පෙන්නයි කියලා…හිහ්…)

සර්: වෙන කවුරු හරි කියන්න… වෙන කෙනෙක්…

කවුදෝ හරි උත්තරය දෙයි.එදා පීරියඩ් එක ඉවර වෙනකම් ඉබ්බා හිටියේ පුදුම අමාරුවෙං.පීරියඩ් එක ඉවරුවනාම මුනිට වෙච්ච හරිය හිතා ගන්න පුලුවන් නෙ.

එදා පටං මුනිට තව කාර්ඩ් එකක් වැටුනා ශ්‍රී වික්‍රම රාජසිංහ….! නින්ජා නම් තාමත් ඉඳලා හිටලා මුනියට කතා කරන්නෙ ඒයි…රාජසිංහ කියලයි.හිහ්…😀

අපේ තාත්තගෙ දුවෙක්…

ඔන්න සුපුරුදු පරිදි දවසක් ඉබ්බයි ඔෆිස් එකේ යාළුවො ටිකයි ගියා දවල්ට කන්න. ඒ දවස් වල ඉතිං වැඩිපුරම කලේ කන ගමං කතා කරන එක නෙවෙයි කතා කරන ගමං කන එක. හිහ්…ප්රධාන වැඩේ කන එක නෙවෙයි කතා කරන එක.කතාවෙං කතාව කැරකිලා කැරකිලා ආවා ටියුෂන් කතාවක්.පන්ති ගියපු සර්ලා ගැන කතාව ඇදිලා ආවා කළුවා ගාවට.

බ්රහ්මයා: අපෝ ඕකා මහ මැර ඩයල් එක. දන්නවද? බැන්දෙ ක්ලාස් ආපු හෙන පොඩි කෙල්ලෙක්ව.ඒකත් බලෙන්ම වගේ තමා බැන්දෙ.

ජුන්ඩා: කවුද බං කෙල්ල?

බ්රහ්මයා: අපේ තාත්තගෙ දුවෙක් (කිරි අප්පට බල්ලො පැනපි…)

ඉබ්බා: ඈහ්…දැං ඔය සීන් එක උඹලගෙ අම්මා දන්නවද? උඹලගෙ තාත්තට දුවෙක් ඉන්නව කියලා?

(බ්රහ්මයට අපි දන්න තරමිං හිටියෙ මල්ලි කෙනෙක් ඉතරයි.අක්කා කෙනෙක් වත් නංගි කෙනෙක් වත් නෑ)

සීන් එක බලනකොට බ්රහ්මයට හදිස්සියට දිව පැටලිලා වචනයක් හැලිලා.බුවාට කියන්න ඕනෙ වෙලා තියෙන්නෙ අපේ තාත්තගෙ යාළුවෙක්ගේ දුවෙක් කියලා.යාළුවා හැලිලා.හිහ්..හිහ්…තව පොඩ්ඩෙන් අලි ජරමරයක් වෙන්නෙ උංගෙ අම්මා දැනගත්තා නම් එහෙම😀.

daughter

කෙහෙල් කැන අත පැන්නා වාගේ

banana

මේක නම් කියන්න හොඳ කතාවක් ද මන්දා.

ඉබ්බා එක කාලෙක වැඩ කරපු කොම්පැණියේ ලොක්කා ගෑණු ළමයි නැති තැන්වල බොහොම සද්දෙට නරක වචන පාවිච්චි කරනවා.බොස් ජොලියට කාට හරි නෝන්ඩියක් දාන්න තමා එහෙම කරන්නෙ.

ඉබ්බලා එක්ක වැඩ කරපු අවුරුදු 50ක ඉතර බොහොම තලතුනා අයියා (එල්. එම්. ඊ. අයියා කියලා තමා ඉතිං කවුරුත් බොහොම ගරු සරු ඇතිව කිවුවෙ) කෙනෙක් හිටියා.කට්ටිය බොහොම ගෞරව සම්ප්‍රයුක්තව තමා එයාට ආමන්ත්‍රණය කළෙත් සැළකුවෙත්. ඔන්න දවසක් මෙන්න මෙහෙම කතාවක් ඇති වුනාළු.

බොස්: ආ… එල්. එම්. ඊ. මෙහෙ එනවා මෙහෙ එනවා… තමුසෙව ගොඩ කාලෙකිං දැක්කෙ නෑනෙ.

එල්. එම්. ඊ. අයියා: නිවාඩු හිටියනෙ සේලක. මගේ දකුණු අත කැපුණනෙ මේ ගෙදර කෙහෙල් කනක් කපන්න ගිහින්…

බොස්: ආහ්… කෝ බලන්න… ගොඩක් කැපිලනෙ.

එල්. එම්. ඊ. අයියා: ඔවු සේලක.මේ දැං ටිකක් හොඳයි. වේදනාව ඉවසන්න බැරුව හිටියෙ.තාමත් දකුණු අතිං මුකුත් වැඩක් කරන්න බෑ.

බොස්: හහ්…එතකොට දැං තමුසේ මේ දවස් වල අ* ග*** වං අතින්ද? (ටොයිං….ටොයිං….ඩ්‍රීරීරීං… හිහ්… එල්. එම්. ඊ. අයියව කැරකිලා ගියාළු)

එල්. එම්. ඊ අයියට කොච්චර මළ පැන්නද කියනවා නම් තව තව හේතු කීපෙකුත් මුල් කරගෙන එල්. එම්. ඊ. අයියා ඒ කොම්පැණියෙන් අස් වුනා.

විනිවිදිමි වීදුරුව…

සිරිපාල තමා ඉබ්බගෙ ක්ෂීරපථ විද්‍යාලෙ ඉඳලම යාළුවා. සිරිපාල ගැන ඉබ්බා කලිනුත් ලියල තියනවා. සිරිපාලගෙ සම්පූර්ණ නම ශෝන් සිරිපාල. සිරිපාල පොෂ් ලලනාවියන්ට බැල්ම හෙලනකොට අපි ශෝන් කියලා කතා කරනවා. ඒ ලෙවල් එකට නොහිටියොත් වැඩේ කර ගන්න බෑනෙ. දෙකේ කොලේට දාලා බයිට් කරන්න ඕනෙ වුනාම නිකම්ම නිකං සිරිපාල වෙනවා.

සිරිපාල ක්ෂීරපථ විද්‍යාලෙට ඇවිත් මුලින්ම සෙට් වුනේ අතඋඩයි, චම්ලියි, බ්‍රහ්මයයි එක්ක. සිරිපාල ඒ කාලෙ නිකං ප්‍රොෆෙසර් කෙනෙක් වෙයි වගෙ තමා හිටියෙ. ඉබ්බත් බැළුවා කවුද යකෝ මේ හෙන විද්වත් සාකච්ඡා පවත්වන බුවා කියලා.කොහොම කොහොම හරි සිරිපාලයා ඉබ්බට සෙට් වුනා. ඒක තමා සිරිපාලයගෙ අවසානය. පාප මිත්‍ර සේවනය. ප්‍රොෆෙසර් කෙනෙක් වෙන්න හිටපු සිරිපාලයගේ ගමන ඔක්කොම කඩා කප්පල් වුනා.

ඉබ්බයි සිරිපාලයි මුලින්ම වැඩට ගියෙත් එකම කොම්පැනියකට. එතන ඉතිං දවල් කෑමට කැෆේ එකට යනවා. එකතු වෙලා දවල් කෑම කන 10ක ඉතර සෙට් එකක තමා ඉබ්බයි සිරිපාලයිත් හිටියේ. ඔන්න සිරිපාල ඉබ්බට ටිකකට කලින් බෙදා ගෙන ඉඳ ගන්න අනිත් කට්ටිය ඉන්න තැනට යනවා. ඉබ්බත් බෙදාගෙන ඉවර වෙලා බැළුවා කෝ සිරිපාල කියලා. සිරිපාල කඩාගෙන බිඳගෙන අනිත් යාළුවෝ ඉන්න ටේබල් එකට තියන කෙටිම මග ඔස්සේ ගමන් කරනවා. සිරිපාල එහෙම තමා. හෙනට ප්‍රොසෙස් කරළා ඔප්ටිමම් විදියට තමා වැඩ කරන්නෙ.

එක පාරටම පොඩි ඩප්පියක් ගැහුව වගේ පටෝර් ගෑවා.මුළු කැෆේ එකේම හිටපු මිනිස්සු උඩ ගිහින් සද්දෙ ආපු පැත්ත බැලුවා.හත් ඉලවුවයි.සිරිපාලයා අර සුපර් මෑන් බිත්ති අස්සෙන් කන්නාඩි දාලා බලනවා වගේ කෑම පිඟානත් අරන් වීදුරුවකින් එහාට යන්න ගිහින්.

කෑම බාගයක් උගේ ඇඟේ, කාලක් වීදුරුවේ, ඉතුරු ටික පිඟානත් එක්ක බිම. එක පාරට කඩි ගුලක් ඇවිස්සුනා වගේ කිචන් එකේ වැඩ කරන මිනිස්සුයි, වේටර්ලයි ඇයි ඇයි සර් මොකද වුනේ… සර්ට තුවාලද අරකද මේකද කිය කිය දුවගෙන එනවා සිරිපාල ගාවට. උන් සිරිපාලව පිහිදනවා. එක වැඩයි.ඉබ්බා හිමීන්සීරුවේ සිරිපාලව දන්නෙ නෑ වගේ එතනින් ගිහින් අනිත් කට්ටිය ඉන්න ටේබල් එකෙන් ඉඳගත්තා (පාප මිත්‍රයෝ කියන්නෙ නිකං යැ).

දැං කට්ටිය කතාව. අප්පා… සිරිපාලයා අදත් අපේ ටේබල් එකට එයිද? එහෙම වුනොත් ලැජ්ජාවේ බෑ බං කිය කිය කනවා.මෙන්න යකෝ විනාඩි 5 කින් ඉතර මුකුත් වුනේ නෑ වගේ තවත් දඩාර බත් එකක් බෙදාගෙන සිරිපාලය ඇවිත් ඒ ටේබල් එකෙන්ම වාඩි වෙන්න. අනිත් කට්ටිය ඔක්කොම එතන සිරිපාලයා නෑ වගේ මූණු ඔබාගෙන බත් කනවා. කැෆේ එකේ අනිත් කට්ටියගේ අවධානය අයින් වෙනකම් ඉඳලා ටේබල් එකේ වාඩි වෙලා ඉන්න සිරිපාලයගෙන් ජුන්ඩා අහනවා මොකක්ද බං උඹ ඒ කරන්න හැදුවෙ කියලා. සිරිපාලයා කියනවා ඌ හිතුවේ එතන වීදුරු දොරක් තියනවා කියලළු. ඒකළු ඌ ඒක ඇතුලෙන් යන්න හැදුවේ.

ඉබ්බා නම් හිතුවේ අර ඉස්සර කතාවක් තිබ්බෙ සමනල්ලු පියාඹගෙන ගිහින් සිරීපාදෙ ඔළුව ගහගෙන මැරෙනවා කියලා. අන්න ඒ වගේ සිරිපාලත් ඔෆිස් එකේ වීදුරුවක ඔළුව ගහගෙන මැරෙන්න හදනවා කියලයි.හිහ්…😀

« Older entries

පසුහඹන්න

Get every new post delivered to your Inbox.

Join 25 other followers